Eliana Martíns (Santiago).
Unha sentenza obriga a pechar unha das salas máis emblemáticas de Compostela. O 30 de xuño a Sala Yago deixará de funcionar definitivamente, porque os seus propietarios empeñáronse en recuperalo e non queren vendelo aos actuais inquilinos. A programación quedara suspendida a partir de xuño e agora xa se sabe por qué.
A Sala Yago, no corazón da Zona Vella Compostelana, tiña un contrato de aluguer dende 1997 cunha empresa que xa desapareceu, e os donos non quixeron renovar o acordo. Tras dous xuizos gañados polo xestores da sala que permitíu alongar a súa existencia durante 4 anos, a familia propietaria gañou un terceiro. Dende a sala descartan un recurso, polo que a partir do mes de xullo a Yago pechará as súas portas indefinidamente.
Reaccións
O anuncio do peche da Sala Yago está a recibir resposta por parte das institucións culturais, que pretenden tomar cartas no asunto. O concelleiro de Cultura de Santiago, Néstor Rego, asegurou que o Concello "debe dar os pasos necesarios" para facerse coa titularidade do edificio.
Tamén a conselleira de Cultura, Ánxela Bugallo, se comprometeu a estudar o asunto e amosou a súa disposición a colaborar, segundo informou a concellería de cultura de Compostela. Ademais, o Instituto Galego de Artes Escénicas e Musicais (Igaem) apoiou aos directores da Sala coa axilización do pagamento das subvencións a Teatro do Noroeste e Títeres Cachirulo.
Polo de agora, só queda aterse á resolución xudicial que ordea a Teatro do Noroeste e a Títeres Cachirulo a abandonar a sala. A codirectora da sala, Luma Gómez asegurou que se "sente frustración por non poder continuar co proxecto, pola perda dun equipo cohesionado, e polo público". A actriz asegurou que co peche da Sala se perden tamén cinco postos de traballo de empregados na Yago.
A dirección da Sala activou unha dirección de correo electrónico (dereitoapataleo@salayago.com) para que o público exprese a súa opinión sobre o peche, e remitirá os correos electrónicos "ás autoridades pertinentes".
15/05/2007
